// Sajak Minang Pinto Janir
Den hantak tumik jo tapak
Rarak karang pasuk bumi
Bagoyang jantuang hati
manggarik si limpo-limpo
manangih darah sirah
Tasuruik darah putiah
Buruak takubua
Elok tabudua
Sapadiah mato mamandang
Labiah barek bahu mamikua
Nan sampai baadaik tibo
Nan tubo baadaik cilako
Hiduik di duya bukan tando tanyo
Tapi jawek nan alah tatando
Kojo tak kojo
sio sio padanannyo
tumbuah utang
jo apa pambayianyo?
Lapuak lapak
Laguak lago
sorai jo sorak
Gili gilo manggilo
Marasai kulik dipantak rangik
Kancang gawik tumbuah luko
Kareh garuang
Marapi singgalang
Dipulun ombak mangguluang
dikisai limbubu manyantuang
Hujan batu jatuah bak nago
Ratok ratuang saluang
basalo salo
Mandayu dayu rabab mandendangkannyo
Isi kaba babungkuih aiamato
Bakaba galok langik kalam
Basalimuik awan awan hitam
Ulah sudu saliang tikam manikam
Antah mano antah sia ko lah lawan
Antah mano antah sia pulo kawan
Hujan sirah aia mato silau basilam
Sakareh galodo manyapu malam
Sakik, sia ka mandanganyo?
Sajak rantiang mancucuak mato
Badan sansai tahimpok dahan
Tasuo narako basangko sarugo
Tasansam sangsaro
basangko taman bungo
Jalan hiduik ka mati
Jalan mati hiduikkan hati
Sasek di jalan
Lakeh tanyo diri
Latakkan tangan di dado
Tabikkan salam ka sabatang badan
Hiruik angok timang-timang raso
Tinggakan raso ka Nan Kuaso
Tarang jaleh jalan ka muko
Usah baarak selo
sabalun jaleh
Apo jantan
Apo batino
Apo api
Apo cahayo?
Nan tarang indak mamanggang
Nan cahayo indak mahanguihkan
Jaleh molah tagak duduknyo
Duduak manakua
Adaik tagak ka muko
Nan zalim disanggah
Nan adia disambah
Nan bana hak Nan Kuaso
Tagak adia bukan tagak cayah
Tagak zalim tagak guyah
Salapeh aruah mandanga
Tagak tagok muruah diri
Tajawek sudah sagalo pakaro
Sanang gadang induak kiro kiro
Sabatang rokok tapanggang
Abu dijantiak ka tampeknyo
Sagaleh kopi konco langang
Lapang dado tarang cuaco
Hiduik di duya bukan rupo rupo
Bukan pulo uncang puro puro
Hiduik basuku suku pakuaik raso raso
Hiduik basaku saku silang sangketo
Bukan rantak tak saalua garak
Bukan lantai data tapi cungak
Kandak gadang balindak lindak
Bayang rusak manga camin dirarak?
Jikok hiduik indak batapak
Lupo tampek tagak
Apo tampak
Apo disipak
Hiduik pun indak
mati pun anggak
Apo bana nan sabana hiduik
Acok tasabuik sabuik
Apo ko sabuik kalapo
Atau hanyo
sabuik tangkurak kapalo
Hiduik nan tasabuik
Sabuikkan nan hiduik
Batungkek ujuang lidah ka langik
di maqom bilik paliang rasio
maunjua basimpuah
ka nan kuaso
di sinan kato hiduik
nan sabana
hiduik
Makin lunak makin kareh
Makin diam makin lapeh
Bukan manikam jajak
Nan jajak tatingga
Indak maluko
Isuak molah
mungkin
Tingga
carito
…..
….
..
.
Jakarta 31 Desember 2024
